فنون

تعبت أشكي..تعبت أبكي.. مآسي الروح
ظلمني الوقت وظروفه.. ذبحني وجفف أنهاري
أخبي علتي وأسكت..وأنا في داخلي مذبوح
أجامل وأرسم الضحكه..وأنا قلبي على ناري
أحاول والله يعلم بي..أداري دمعتي لاأبوح
وأداري الجرح واتجاهل.عن اللي ينشد أخباري
أقول: بخير لكني..جريح في حشاه جروح
صداها لو دفنته يوم..يبين سنين بأنظاري
حرقت بحسرتي يكفي..صرخت بصوتي المبحوح
ألا ياوقت وش ذنبي..عشان ألقيك بأعذاري
تبعثر حلمي قدامي..وغديت بدنيتي متروح
وقفت ولا قدرت أجمع..شتات نفسي وأفكاري
أمني النفس واخدعها..وأقول: إن كربتي بتروح
وهي والله مولوده..قدر مع أقداري
قتيل والبقاء براسي..في دنيا مابها مصلوح
قتيل والقهر قاتل..من اللي ياخذ بثاري
أنا ببقى ضحية وقت..أعاني والعنا مجروح
دعيت اللي خلق يرحم..رجيته ربي الباري
أبي أسعد أنا بلحظه..قبل نزعه توافي الروح
قبل ماأرحل عن الدنيا..وأروح لآخر دياري
أنا بأحمل جديد الجرح..في باقي وقتي المسموح
وإذا وافتني القدره..ترى هالبيت تذكاري
رثاني دمعي الطاهر في صمت مارضى بالنوح
رثتني قسوة الدنيا..ورثتني حتى أشعاري